ကျောင်းသားတွေရဲ့ အာရုံစူးစိုက်မှုကို ကြာကြာထိန်းထားနိုင်မယ့် နည်းလမ်းများ

ကျောင်းသားတစ်ဦးရဲ့ အာရုံစိုက်နိုင်မှု အချိန်က တစ်ဦးနဲ့တစ်ဦးတော့ မတူနိုင်ပါဘူး။ အာရုံကြောဆိုင်ရာ သိပ္ပံပညာရှင်တွေရဲ့ ပြောပြချက်အရ လူတွေက အသက်ကြီးလာတာနဲ့အမျှ အာရုံစိုက်နိုင်မှုအချိန်က ပိုကြာလာတယ်လို့ သိရပါတယ်။ လူတစ်ဦးရဲ့ ပျှမ်းမျှ အာရုံစိုက်နိုင်မှုအချိန်ကို အောက်က ဖော်မြူလာနဲ့ တွက်ချက်နိုင်တယ်လို့ ကျွမ်းကျင်သူတွေက ဆိုပါတယ်။

Age × 2-5 minutes = Average Attention Span

ဒီလိုဆိုရင် ကျောင်းသားတွေရဲ့ အသက်အရွယ်အလိုက် ကွဲပြားတဲ့ အာရုံစူးစိုက်နိုင်မှုအချိန်တွေကို သိသွားလောက်ပါပြီ။ မိမိသင်ရတဲ့ အတန်းအလိုက် ကျောင်းသားတွေရဲ့ အာရုံစူးစိုက်မှု အချိန်ကို ဒီထက်ကြာကြာပိုလိုချင်တယ်ဆိုရင်တော့ အောက်ကနည်းလမ်းလမ်းတွေကို အသုံးပြုကြည့်ပါ။

၁။ သင်ခန်းစာတစ်ခုကို အပိုင်းငယ်လေးတွေ ခွဲပါ။

သင်ခန်းစာတစ်ခုလုံးကို တစ်ချိန်တည်းမှာ သင်တာထက် အပိုင်းလေးတွေ ခွဲပြီး သင်ကြားတာ ပိုထိရောက်ပါတယ်။ (၁၅) မိနစ်ကို တစ်ခါ အပိုင်းတစ်ပိုင်း သင်ကြားပါ။ ဒီလိုဆိုရင် ကျောင်းသားတွေရဲ့ အာရုံကို လန်းဆန်းစေပြီး ဝန်ပိခြင်းမှလည်း ရှောင်ရှားနိုင်ပါတယ်။

၂။ အုပ်စုအငယ်လေးတွေ ဖွဲ့ပြီး သင်ပါ။

Carnegie Mellon နဲ့ Columbia University တို့ရဲ့ ၂၀၁၆ လေ့လာမှုအရ ကျောင်းသားတွေက လူအများကြီး စုပြုံပြီး ဆရာစာသင်တာ နားထောင်ခြင်းက အာရုံပျံ့လွင်မှုကို ပိုပြီး ဖြစ်စေတယ်လို့ ပြောပါတယ်။ ဒါကြောင့် အဖွဲ့လေးတွေ ဖွဲ့ပြီး hands-on Activities လေးတွေ လုပ်ခိုင်းမယ်ဆိုရင် ပိုပြီးတော့ အာရုံစိုက်နိုင်ပါတယ်။

၃။ ဦးနှောက်ကို အနားပေးပါ။

စာသင်ချိန်တစ်ချိန်လုံး စာသင်နေတာမျိုး မလုပ်ဘဲ အကြောဆန့်တာ၊ လှုပ်ရှားတာ၊ ဂိမ်းကစားတာ စတဲ့ Activities တစ်ခုခု လုပ်ဆောင်စေပါ။ ဒါက နောက်အလုပ်တစ်ခုကို မရွှေ့ခင် သူတို့ရဲ့ ဦးနှောက်ကို အားပြန်သွင်းဖို့ အချိန်ပေးလိုက်တာ ဖြစ်ပါတယ်။

၄။ စိတ်လေ့ကျင့်ခန်းများ ပြုလုပ်စေပါ။

ရိုးရှင်းတဲ့ စိတ်ပိုင်းဆိုင်ရာ လေ့ကျင့်ခန်းတစ်ခုခုကို နေ့စဉ် လုပ်ပါ။ ဥပမာ - အသက်ပြင်းပြင်း ရှူသွင်း/ရှူထုတ်တာ၊ တရားထိုင်တာ။ ဒီလို စိတ်လေ့ကျင့်ခန်းတွေက စိတ်ကို တည်ငြိမ်စေပြီး မိမိကိုယ်ကို ထိန်းချုပ်နိုင်စွမ်း တိုးလာတာနဲအမျှ အာရုံစူးစိုက်မှုအား ပိုကောင်းလာစေပါတယ်။

၅။ Flexible Seating ပြင်ဆင်ပါ။

အထူးသဖြင့် အတန်းငယ်လေးတွေကို စာသင်တဲ့အခါမှာ ဘယ်နေရာမှာ ထိုင်ရမယ်၊ ဘယ်လိုထိုင်ရမယ်ဆိုတာ ရွေးချယ်ခွင့်ပေးပါ။ ဥပမာ- အမြင့်မှာ ထိုင်ချင်တဲ့သူတွေအတွက် ထိုင်ခုံတွေ၊ စားပွဲတွေ၊ အောက်မှာထိုင်ချင်သူတွေအတွက် ကြမ်းပြင်ကူရှင်တွေ ထားပေးထားရပါမယ်။ လူတိုင်းကို တစ်သမတ်တည်း ထိုင်ခိုင်းနေတာထက် ကျောင်းသားတွေ ပိုပြီး သက်တောင့်သက်သာဖြစ်စေမယ့် ပုံစံကို ရွေးချယ်ထိုင်ခိုင်းသင့်ပါတယ်။

၆။ အချိန်ကိုစောင့်ကြည့်ပါ

အချိန်ဘယ်လောက်ကြာတဲ့အထိ သင်ခန်းစာကို သင်လိုက်လဲဆိုတာ သတိပြုမိစေဖို့ အချိန်ကို စောင့်ကြည့်ပါ။ ကျောင်းသားတွေရဲ့ အမူအရာက မငြိမ်မသက်ဖြစ်နေတာကို သတိထားမိပြီဆိုတာနဲ့ ခဏနားတာ၊ စာသင်နည်းနောက်တစ်မျိုးကို ပြောင်းတာ၊ အရှေ့ကသင်လိုက်တာကို စာပြန်မေးတာ စတာတွေကို လုပ်ဆောင်ပါ။

၇။ စာသင်ခန်းပြင်ဆင်မှုကို လျှော့ပါ။

ကျောင်းသားတွေရဲ့ စိတ်ဝင်စားမှုကို ရရှိဖို့ ရောင်စုံပုံလေးတွေ စာသင်ခန်း နံရံမှာ ကပ်ထားတာမျိုးက လုပ်ဆောင်သင့်တဲ့အရာဆိုပေမဲ့ အလွန်အကျူး မဖြစ်ဖို့တော့ လိုအပ်ပါတယ်။ ရှုပ်ပွနေတဲ့ နံရံတွေကို ကြည့်ပြီး အမြင်အာရုံ ရှုပ်ထွေးလွန်ပြီး အာရုံစူးစိုက်မှုကို ပျောက်ကွယ်စေနိုင်ပါတယ်။ အေးအေးငြိမ်ငြိမ်လေးရှိတဲ့ စာသင်ခန်းကသာ ကောင်းမွန်တဲ့ အာရုံစူးစိုက်မှုကို ဖြစ်ပေါ်စေတာပါ။