လက်မှတ်မဲ့ ဆရာ/ဆရာမ(၂) သောင်းခွဲကျော်ကိုစာပေးစာယူသင်တန်းပေးမည်

လက်မှတ်မဲ့ ဆရာ/ဆရာမ(၂) သောင်းခွဲကျော်ကိုစာပေးစာယူသင်တန်းပေးမည်

ဆရာအတတ်ပညာလက်မှတ်မရှိသေးသည့် မူလတန်းပြနှင့် အလယ်တန်းပြ နှစ်သောင်းခွဲကျော်ကို ယခုနှစ်အောက်တိုဘာမှစတင်ပြီး လာမည့်နှစ် ဧပြီလ အထိနှစ်ကြိမ်ခွဲကာ စာပေးစာယူသင်တန်းဖွင့်လှစ်မည်ဖြစ်ကြောင်းသိရပါသည်။


အခြေခံပညာဦးစီးဌာန လက်အောက်ရှိ အခြေခံပညာကျောင်းများတွင် တာဝန်ထမ်းဆောင်နေသော ဆရာ/ဆရာမများထဲမှ လက်မှတ်မဲ့အလယ်တန်းတန်းပြ (၂၄၄၉၁) ဦးနှင့် မူလတန်းပြ (၁၁၉၄) ဦးစုစုပေါင်းနှစ်သောင်းခွဲကျော်သည် ဆရာဖြစ်သင်တန်းများပို့ချရန် လိုအပ်နေသည့်အတွက် လုပ်ငန်းခွင်မပျက်စာပေးစာယူသင်တန်းများကို ယခုနှစ်အောက်တိုဘာလမှ စတင်ကာ လာမည့်နှစ် ဧပြီလ အထိ နှစ်ကြိမ်ခွဲကာ ဖွင့်လှစ်ပို့ချပေးသွားမည်ဖြစ်ကြောင်း အခြေခံပညာဦးစီးဌာနမှ သိရပါသည်။


“ စာပေးစာယူသင်တန်း တက်ရောက်ပြီးရင်တော့ ဆရာအတတ်ပညာလက်မှတ်ရမှာပေါ့။ ပညာရေးဝန်ကြီးဌာနရဲ့ အမျိုးသားပညာရေးမဟာဗျူဟာ စီမံကိန်းအရ ဆရာ၊ ဆရာမတွေအရည်အသွေးဖွံ့ဖြိုးတိုးတက်ဖို့နဲ့ လက်မှတ်မရှိသေးတဲ့ ဆရာ၊ ဆရာမတွေလက်မှတ်ရရှိအောင် သင်တန်းပေးမှာပါ" ဟု အခြေခံပညာဦးစီးဌာနမှ အရာရှိတစ်ဦးက ဒီမိုကရေစီတူဒေးသို့ သြဂုတ် (၂၃) ရက်ကပြောကြားသည်။


ဖွင့်လှစ်ပို့ချမည့် အလယ်တန်းဆရာအတတ်စာပေးစာယူသင်တန်းအမှတ်စဉ် (၃၈) ကို လာမည့်အောက်တိုဘာ (၁၂) ရက်မှ (၂၆) ရက်အထိ (၁၂) ရက်ဖွင့်လှစ်ပို့ချမည်ဖြစ်ပြီး (၂၀၂၀) ပြည့်နှစ်ဧပြီ (၂၀)ရက်မှ (၂၇) ရက်အထိ သင်တန်းဖွင့်ရက် (၇) ရက်နှင့်မေ (၅) ရက်အထိ စာမေးပွဲစစ်ဆေးခြင်း (၆) ရက်ဖြင့် Face to Face နှစ်ကြိမ်ခွဲကာ ဖွင့်လှစ်မည်ဖြစ်ပါသည်။


ယင်းကဲ့သို့ ဆောင်ရွက်ခြင်းသည် လုပ်ငန်းခွင်အတွင်းရှိ ဆရာဆရာမများ ဆရာအတတ်ပညာဆိုင်ရာ အသိအမှတ်ပြုလက်မှတ်ရရှိစေပြီး အလယ်တန်းအဆင့်နှင့် မူလတန်းအဆင့်ဘာသာရပ်များကို သင်ကြားသင်ယူသည့် အရည်အသွေးများတိုးမြှင့်လာစေရန်နှင့် နည်းစနစ်တကျသင်ကြားလေ့ကျင့်ပေးနိုင်ရန် အတွက်ရည်ရွယ်ကြောင်းသိရပါသည်။

 

Read More:>>>> စီးပွားရေးလုပ်ငန်းစီမံခန့်ခွဲမှု ပညာမဟာဘွဲ့ (EMBA)နှင့် ပြည့်သူ့ရေးရာစီမံခန့်ခွဲမှုမဟာဘွဲ့(EMPA)သင်တန်း


၂၀၁၉-၂၀၂၀ ပညာသင်နှစ်တွင် အဆိုပါဆရာ၊ ဆရာမများသည် ဇွန်လနှင့် ဇူလှိုင်လတို့တွင် မိမိတို့တာဝန်ထမ်းဆောင်ရာကျောင်းများတွင် လက်တွေ့တန်းပြအဖြစ် လေ့ကျင့်ရမည်ဖြစ်ကြောင်း သိရပါသည်။


Source; Democracy

 

Education Read 1524 times