တက္ကသိုလ်ဝင်စာမေးပွဲ ဖြေဆိုခွင့်လျှောက်လွှာ စက်တင်ဘာလအတွင်း လျှောက်ထားရမည်

၂၀၂၆ ခုနှစ်၊ တက္ကသိုလ်ဝင်စာမေးပွဲတွင် ဝင်ရောက်ဖြေဆိုမည့်သူများအနေဖြင့် ဖြေဆိုခွင့်လျှောက်လွှာကို မြန်မာနိုင်ငံစာစစ်ဦးစီးဌာန (နေပြည်တော်နှင့် ရန်ကုန်) တွင် ဝယ်ယူပြီး စက်တင်ဘာလ (၁) ရက်နေ့မှ (၃၀) ရက်နေ့အတွင်း လျှောက်ထားကြရပါမည်။

ဖြေဆိုခွင့်လျှောက်လွှာ တစ်စောင်လျှင် (၂၀၀) ကျပ်နှင့် စာမေးပွဲဝင်ကြေးအတွက် (၇ဝ၀) ကျပ် တန်ဖိုးရှိ ပညာရေးဝန်ကြီးဌာန ငွေသွင်းတံဆိပ်ခေါင်းတို့ကို မြန်မာနိုင်ငံစာစစ်ဦးစီးဌာန (ရုံးချုပ်)၊ ရုံးအမှတ် (၅၂) နေပြည်တော်နှင့် မြန်မာနိုင်ငံစာစစ်ဦးစီးဌာန (ရန်ကုန်ရုံးခွဲ)၊ ပါရမီလမ်း၊ (၁၂) ရပ်ကွက်၊ လှိုင်မြို့နယ်၊ ရန်ကုန်တွင် ၂၀၂၅ ခုနှစ်၊ စက်တင်ဘာလ (၁) ရက်နေ့မှ စက်တင်ဘာလ (၃၀) ရက်နေ့အထိ ရောင်းချပေးမည်ဖြစ်ပါသည်။

တက္ကသိုလ်ဝင်စာမေးပွဲကို STEAMS (1) ၊ STEAMS (2) နှင့် STAMS ဘာသာတွဲ (၃) တွဲဖြင့် ကျင်းပမည်ဖြစ်ပြီး  STEAMS (1) နှင့် (2) ဖြေဆိုမည့်သူများအတွက် အစိမ်းရောင်ဖြေဆိုခွင့်လျှောက်လွှာနှင့် ကတ်ပြားပုံစံဖြင့်လည်းကောင်း၊ STAMS ဖြေဆိုမည့်သူများအတွက် ပန်းရောင်ဖြေဆိုခွင့်လျှောက်လွှာနှင့် ကတ်ပြားပုံစံဖြင့်လည်းကောင်း ဖြေဆိုမည့် ဘာသာတွဲအလိုက် အရောင်နှစ်မျိုး ခွဲခြားသတ်မှတ်ထားပါသည်။

အခြေခံပညာအထက်တန်းကျောင်းများ၊ ကျောင်းခွဲများ၊ တွဲဖက်ကျောင်းများနှင့် ကိုယ်ပိုင်အထက်တန်းကျောင်းများမှ ဖြေဆိုရန် လျှောက်လွှာတင်သွင်းမည့် ကျောင်းသား၊ ကျောင်းသူများအတွက် သက်ဆိုင်ရာ ကျောင်းအုပ်ကြီးများသည် လျှောက်လွှာတစ်စောင်ချင်းစီတွင် ပညာရေးဝန်ကြီးဌာန ငွေသွင်းတံဆိပ်ခေါင်းများကို ကပ်၍ မိမိတို့ကျောင်းအလိုက် ဖြေဆိုခွင့်လျှောက်လွှာများကို မြန်မာနိုင်ငံစာစစ်ဦးစီးဌာနသို့ ၂၀၂၅ ခုနှစ်၊ စက်တင်ဘာလ (၁) ရက်နေ့မှ စက်တင်ဘာလ (၃၀) ရက်‌နေ့အတွင်း တင်သွင်းကြရမည်ဖြစ်ပါသည်။

ပြင်ပမှဖြေဆိုရန် လျှောက်လွှာတင်သွင်းမည့်သူများသည် သက်ဆိုင်ရာမြို့နယ် ပညာရေးမှူးရုံးများတွင် ပညာရေးဝန်ကြီးဌာန ငွေသွင်းတံဆိပ်ခေါင်းများနှင့် လျှောက်လွှာများ ဝယ်ယူပြီး ဖြေဆိုခွင့်လျှောက်လွှာ၏ လက်ဝဲဘက်ထိပ်ပိုင်းတွင် အဆိုပါငွေသွင်းတံဆိပ်ခေါင်းကပ်၍ မိမိတို့ အမှန်တကယ်နေထိုင်သည့် မြို့နယ်ပညာရေးမှူးရုံးတွင် ၂၀၂၅ ခုနှစ်၊ စက်တင်ဘာလ (၁) ရက်နေ့မှ စက်တင်ဘာလ (၃၀) ရက်နေ့အတွင်း တင်သွင်းကြရမည်ဖြစ်ပါသည်။

ပြင်ပဖြေဆိုသူများအနေဖြင့် ဘာသာတွဲ (၃) ခုဖြစ်သော STEAMS-1 ၊ STEAMS-2 ၊ STAMS တို့အနက်မှ ဘာသာတွဲ (၁) ခုကို ရွေးချယ်ဖြေဆိုနိုင်သည်။ 

ပြင်ပဖြေအဖြစ် ဖြေဆိုခွင့်ရှိသူများ

• စနစ်ဟောင်း ဒသမတန်း (Grade 11) တက္ကသိုလ်ဝင်စာမေးပွဲ ကျရှုံးသူများ
• စနစ်သစ် ဒွါဒသမတန်း (Grade 12) တက္ကသိုလ်ဝင်စာမေးပွဲ ကျရှုံးသူများ
• စနစ်သစ် ဧကာဒသမတန်း (Grade 11) စာမေးပွဲကို ပြင်ပမှ ဖြေဆိုအောင်မြင်သူများ
• စနစ်သစ် ဧကာဒသမတန်း (Grade 11) အောင်မြင်ခဲ့ပြီး အကြောင်းအမျိုးမျိုးကြောင့် ကျောင်းပြင်ပရောက်နေသူများ
• စနစ်ဟောင်း န၀မတန်း (Grade 10) အောင်မြင်ခဲ့ပြီး အကြောင်းအမျိုးမျိုးကြောင့် ကျောင်းပြင်ပရောက်နေသူများ

သတိထားရမည့်အချက်များ

• သတ်မှတ်ထားသော ရက်များအတွင်း အချိန်မီပေးပို့ခြင်း မရှိသူများသည် စာမေးပွဲဖြေဆိုခွင့် ရရှိကြမည် မဟုတ်ပါ။
• စာဖြေသူ တင်သွင်းသည့် စာမေးပွဲဖြေဆိုခွင့်လျှောက်လွှာနှင့် ကတ်ပြားတွင် ဖော်ပြပါရှိသည့် ဘာသာတွဲမှအပ အခြားဘာသာတွဲသို့ ပြောင်းလဲ ဖြေဆိုခွင့်ပြုမည်မဟုတ်ပါ။
• မိမိဖြေဆိုမည့် ဘာသာတွဲအလိုက် အချက်အလက်များ မှန်ကန်မှု ရှိ/မရှိ သေချာစွာ စစ်ဆေးပြီး ပေးပို့ကြရပါမည်။
• မြန်မာနိုင်ငံစာစစ်ဦးစီးဌာနတွင် မှတ်တမ်းတင်ထားသည့် ဤအချက်အလက်များအတိုင်းသာ တက္ကသိုလ်ဝင်စာမေးပွဲ အောင်လက်မှတ် ထုတ်ပေးပါသည်။
• စာမေးပွဲ အောင်မြင်ပြီးပါက အဆိုပါ အချက်အလက်များကို မည်သည့် အကြောင်းပြချက်၊ မည်သည့်လုပ်ဆောင်ချက်၊ မည်သည့်နည်းလမ်းနှင့်မျှ ပြင်ဆင်ခွင့်ပြုမည် မဟုတ်ပါ။

======================

ပညာရေးဆိုင်ရာ သတင်းအချက်အလက် အစုံအလင်ကို
Telegram နှင့် Viber မှာလည်း အလွယ်တကူ ဖတ်ရှုနိုင်ပါတယ်။

> https://t.me/eudcationguide (Telegram)

> https://invite.viber.com/? (Viber)

နှစ်ပတ်တစ်ကြိမ် ပေးပို့နေတဲ့ Education Bulletin ကို
ရယူဖို့လည်း Subscribe လုပ်ထားနိုင်ပါတယ်။

> https://shorturl.at/ktCaP