STEM၊ STEAM နှင့် STREAM ပညာရေးတို့၏ ကွာခြားချက်များ

ယနေ့ခေတ် ပညာရေးနယ်ပယ်မှ ပညာရှင်များသည် ကျောင်းသားများအတွက် သင်ယူမှုလုပ်ငန်းစဉ်နှင့် အနာဂတ်အတွက် ကြိုတင်ပြင်ဆင်မှုကို အလေးပေးလာသည်နှင့်အမျှ STEM၊ STEAM နှင့် STREAM ပညာရေးတို့အား အာရုံစိုက်မှု ပိုမို မြင့်တက်လာသည်။

STEM ကိုတော့ ပညာရှင်များ၊ ဆရာများ၊ မိဘများ၊ ကျောင်းသားများ ရင်းနှီးပြီးသားဖြစ်သော်လည်း STEAM နှင့် STREAM တို့ကိုတော့ လူသိနည်းနေသေးသည်ဟု ယူဆမိပါသည်။ ထို့ကြောင့် အောက်တွင် ဤပညာရေးအယူအဆသုံးခုကြား ကွာခြားချက်များကို ရှင်းပြထားပါသည်။

STEM အကြောင်း အသေးစိတ်ဖတ်ရှုရန် > https://www.edge.com.mm/article/stem-education-in-real-world.html

STEM နှင့် STEAM

STEM သည် သိပ္ပံ (Science)၊  နည်းပညာ (Technology)၊ အင်ဂျင်နီယာ (Engineering)၊ သင်္ချာ (Mathematics) စသည့် ဘာသာရပ်ကြီး (၄) ခုကို ချိတ်ဆက်သင်ကြားပေးသည့် ပညာရေးမျိုးဖြစ်သည်။ နောက်ပိုင်းတွင် STEM ထက် Art ဆိုသည့် A တစ်လုံး အပိုပါသည့် STEAM ပညာရေးကို ပညာရှင်တွေက ပိုပြီး အာရုံစိုက်လာကြသည်။ 

STEAM ဆိုသည်မှာ STEM ဘာသာရပ်များတွင် အနုပညာ၊ ဂီတနှင့် ဒီဇိုင်းကဲ့သို့သော ဖန်တီးမှုဆိုင်ရာ ဘာသာရပ်များကို ပေါင်းစပ်ထားသော ပညာရေးဖြစ်သည်။ အနုပညာနှင့် ဒီဇိုင်းကို စိတ်ဝင်စားသော ကျောင်းသားများကို ဆွဲဆောင်နိုင်ရုံသာမက ၎င်းတို့၏ တီထွင်ဖန်တီးနိုင်စွမ်းကိုလည်း မြှင့်တင်ပေးပါသည်။

STEAM ပညာရေးတွင် Language Arts၊ Humanities၊ Visual Arts ကဲ့သို့ ဘာသာရပ်များ ပါဝင်ပြီး ကျောင်းသားများအား မတူညီသော ဘာသာရပ်များကို နက်နက်နဲနဲ စူးစမ်းလေ့လာရန်နှင့် အလုပ်ခွင်တွင် ၎င်းတို့၏ ယှဉ်ပြိုင်နိုင်စွမ်းကို အားကောင်းစေရန် ကူညီပေးပါသည်။

STEAM နှင့် STREAM

STREAM သည် STEAM ကို အခြေခံ၍ စာဖတ်ခြင်း (Reading) နှင့် ရေးသားခြင်းစွမ်းရည် (wRiting) များကို ထည့်သွင်းထားပြီး ကျောင်းသားများ၏ ဘာသာစကားနားလည်မှုနှင့် ဖော်ပြနိုင်စွမ်းကို ပိုမိုမြှင့်တင်ပေးပါသည်။ STREAM သည် ကျောင်းသားများ၏ တီထွင်ဖန်တီးခြင်း၊ ဖတ်ရှုခြင်း၊ ရေးသားခြင်း၊ စမ်းသပ်ခြင်းနှင့် တည်ဆောက်ခြင်းဆိုင်ရာ ဖွံ့ဖြိုးတိုးတက်မှုများကို အလေးပေးထားပြီး ကိုယ်ပိုင်တွေးခေါ်မှုနှင့် သင်ယူထားသည်များကို လက်တွေ့အသုံးချနိုင်မှုကို အားပေးပါသည်။

STREAM သည် စာဖတ်စွမ်းရည်မှတစ်ဆင့် ကျောင်းသားများ၏ ပညာရေးထူးချွန်မှုကို မြှင့်တင်ပေးပြီး၊ ရေးသားခြင်းစွမ်းရည်သည် ရှင်းလင်းပြတ်သားစွာနှင့် ယုံကြည်မှုရှိရှိ ထုတ်ဖော်ပြောဆိုနိုင်စေရန် ကူညီပေးကာ အနာဂတ်အောင်မြင်မှုအတွက် လိုအပ်သော ကျွမ်းကျင်မှုများကို ဖြည့်ဆည်းပေးပါသည်။ ကျောင်းသားများအား မိမိကိုယ်ကိုယ် သိမြင်နားလည်မှုရှိလာစေရန်နှင့် အခြားသူများနှင့် ယုံကြည်ချက်ရှိရှိ ဆက်သွယ်ပြောဆိုနိုင်စေရန်လည်း ကူညီပေးပါသည်။

STEAM နှင့် STREAM အားသာချက်များ

ယနေ့ခေတ် လူ့အဖွဲ့အစည်းတွင် STEM ထက် STEAM နှင့် STREAM သည် ပညာရေးလောက၌ ပိုမိုအာရုံစိုက်မှု ရရှိလာပြီး ကျောင်းများတွင်လည်း အသုံးပြုမှု ရှိလာကြသည်။ STEAM ပညာရေး၏ ဘာသာရပ်ပေါင်းစုံ ပေါင်းစပ်မှုသည် ကျောင်းသားများအား သင်္ချာ၊ သိပ္ပံ၊ နည်းပညာ၊ အင်ဂျင်နီယာအပြင် အနုပညာဆိုင်ရာ ဘာသာရပ်များကိုပါ ထိတွေ့စေပြီး ဤဘာသာရပ်များ၏ အပြန်အလှန် ဆက်သွယ်မှုမှတစ်ဆင့် ၎င်းတို့၏ ဝေဖန်ပိုင်းခြားတွေးခေါ်မှု၊ တီထွင်ဖန်တီးမှုနှင့် ပြဿနာဖြေရှင်းနိုင်စွမ်းကို မြှင့်တင်ပေးပါသည်။ STREAM သည် စာဖတ်ခြင်းနှင့် ရေးသားခြင်းကို အလေးပေးခြင်းကြောင့် ကျောင်းသားများအား ကမ္ဘာကြီးအကြောင်း၊  ကြွယ်ဝသော ယဉ်ကျေးမှုနှင့် အခြေခံ ဗဟုသုတများကို ပိုမိုနက်ရှိုင်းစွာ နားလည်စေသည်။

STEAM နှင့် STREAM စိန်ခေါ်မှုများ

အချို့သည် STEAM နှင့် STREAM ကို ရှေးရိုးစွဲအယူအဆ ရှိသည်ဟု ဝေဖန်ပါသည်။ အနုပညာနှင့် စာဖတ်/စာရေး ပါဝင်ခြင်းက STEM ၏ မူလ ရည်မှန်းချက်များကို အားနည်းစေသောကြောင့် STEM ၏ အဓိက ဘာသာရပ်များအပေါ်ကိုသာ အာရုံစိုက်သင့်သည်ဟု ငြင်းခုံကြသည်။

ခြုံငုံသုံးသပ်ရလျှင် အနုပညာ၊ စာဖတ်ခြင်းနှင့် စာရေးခြင်းတို့ကို သင်ရိုးညွှန်းတမ်းထဲတွင် ထည့်သွင်းသင်ကြားခြင်းက ကျောင်းသားများ၏ ဘက်စုံဖွံ့ဖြိုးတိုးတက်မှုကို သိသိသာသာ အထောက်အကူပြုစေပါသည်။

အကျဉ်းချုပ်အားဖြင့် STEM၊ STEAM နှင့် STREAM ပညာရေးတို့သည် ကျောင်းသားများ၏ သင်ယူမှုနှင့် ဖွံ့ဖြိုးတိုးတက်မှုအတွက် ထူးခြားသော တန်ဖိုးများနှင့် ကောင်းကျိုးများ ရှိသည်။ ဆရာများနှင့် မိဘများသည် အသင့်တော်ဆုံး လမ်းကြောင်းကို ရွေးချယ်နိုင်ရန်အတွက် ၎င်းတို့၏ ကွာခြားချက်များကို နားလည်ရန် လိုအပ်သည်။ သို့မှသာ ကျောင်းသားများသည် မတူညီသော ဘာသာရပ်များတွင် မိမိတို့၏ အားသာချက်များကို အသုံးချနိုင်ခြင်း၊ ဗဟုသုတများကို ချိတ်ဆက်နိုင်ခြင်းနှင့် ၎င်းတို့၏ အနာဂတ်ပညာရေးနှင့် လုပ်ငန်းခွင်ဘဝအတွက် ခိုင်မာသော အခြေခံအုတ်မြစ်ကို ချမှတ်နိုင်မည်ဖြစ်သည်။