ကျန်းမာရေးဝန်ကြီးဌာန၊ ကုသရေးဦးစီးဌာန လက်အောက်ရှိ ဗဟိုအဆင့်ဆေးရုံကြီးများနှင့် တိုင်းဒေသကြီး/ ပြည်နယ်ကုသရေးဦးစီးဌာနရှိ ဆေးရုံကြီးများတို့တွင် ဖွင့်လှစ်မည့် ၂၀၂၃-၂၀၂၄ခုနှစ် ပညာသင်နှစ်အတွက် (၆၂) ကြိမ်မြောက် ဆေးဘက်ကျွမ်းကျင် (၄) ဓာတ်ခွဲ (၈) လသင်တန်းသို့ လျှောက်ထားရန် လျှောက်လွှာများ စတင်လက်ခံနေပြီ ဖြစ်ကြောင်း သိရှိရသည်။
လျှောက်ထားလိုသူများအနေဖြင့် လျှောက်လွှာဖောင်များကို နေပြည်တော်/တိုင်းဒေသကြီး/ပြည်နယ် ကုသရေးဦးစီးဌာနများတွင် ရယူပြီး အချက်အလက်ပြည့်စုံစွာ ဖြည့်စွက်၍ လိုအပ်သော စာရွက်စာတမ်းများနှင့်အတူ ပူးတွဲပြီး မိမိလက်ရှိနေထိုင်သော သန်းခေါင်စာရင်းတည်ရှိသည့် တိုင်းဒေသကြီး ပြည်နယ်ကုသရေး ဦးစီးဌာနများသို့ လိပ်မူ၍ လျှောက်လွှာပိတ်ရက် ၂၀၂၃ ခုနှစ် ဧပြီလ ၇ ရက်နေ့ထက် နောက်မကျပဲ လျှောက်ထားပေးရမည်ဟု သိရှိရသည်။
လျှောက်လွှာနှင့်အတူ အောက်ပါအထောက်အထားများကို ပြည့်စုံစွာ တင်ပြရမည်_
ပြည့်စုံစွာ ဖြည့်စွက်ထားသော ကိုယ်ရေးမှတ်တမ်း
မြန်မာနိုင်ငံစာစစ်အဖွဲ့မှ ထုတ်ပေးသည့် အခြေခံပညာ အထက်တန်း (တက္ကသိုလ်ဝင်တန်း စာမေးပွဲအောင်လက်မှတ် (မိတ္တူ) (၁)စောင် နှင့် ရမှတ်စာရင်း (မူရင်း) (၁) စောင် ( San copy လက်မခံပါ။ )
နိုင်ငံသားစိစစ်ရေးကတ်ပြား(မိတ္တူ) (၁)စောင်
အကျင့်စာရိတ္တကောင်းမွန်ကြောင်း၊ ပြစ်မှုကင်းရှင်းကြောင်း၊ သက်ဆိုင်ရာရပ်ကွက်၊ ကျေးရွာအုပ်စု အုပ်ချုပ်ရေးမှူးနှင့် မြန်မာနိုင်ငံ ရဲတပ်ဖွဲ့စခန်းမှ ထောက်ခံချက် (မူရင်း) (၁)စောင်
ကျန်းမာရေး ကောင်းမွန်ကြောင်း၊ ကိုယ်ရော စိတ်ပါ ကျန်းမာကြောင်း၊ သက်ဆိုင်ရာမြို့နယ် ပြည်သူ့ကျန်းမာရေး ကုသရေး ဦးစီးဌာနမှူး၏ ဆေးထောက်ခံစာ(မူရင်း) (၁)စောင်
မိမိလက်ရှိ နေထိုင်သော သန်းခေါင်စာရင်း (မိတ္တူ) (၁)စောင်
ဌာနဆိုင်ရာ ၀န်ထမ်းဖြစ်လျှင် (သင်တန်းတက်ခွင့်ရရှိပါက) ရာထူးမှ နုတ်ထွက်ခွင့်ပြုမည် ဖြစ်ကြောင်း၊ သက်ဆိုင်ရာ အကြီးအကဲ၏ ထောက်ခံစာ(မူရင်း) (၁)စောင်
လျှောက်လွှာပုံစံတွင် လိုင်စင်ဓာတ်ပုံ (၁) ပုံကပ်ပြီး၊ ဓာတ်ပုံ (၂)ပုံကို ပူးတွဲ ပေးပို့ရမည်။
(၃)လအတွင်း ရိုက်ကူးထားသော ပီပြင်ထင်ရှားသည့် ပတ်စ်ပို့အရွယ် ဓာတ်ပုံဖြစ်ရမည်။ ဓာတ်ပုံနောက်ကျောတွင် လျှောက်ထားသူအမည်၊ နိုင်ငံသား စိစစ်ရေးအမှတ်များ ရေးရမည်။
(မှတ်ချက်။ ထောက်ခံစာများ အားလုံးတွင် ထောက်ခံပေးသူ၏ အမည်၊ လက်မှတ်ရာထူး တံဆိပ်တုံး၊ ရုံးတံဆိပ်ပိုင်း ပါရှိရမည်။)
Advertisement
သင်တန်းသို့ အောက်ပါသတ်မှတ်ချက်များနှင့်ကိုက်ညီသူများ လျှောက်ထားနိုင်သည်_
(က) ပြည်ထောင်စုသမ္မတမြန်မာနိုင်ငံသားဖြစ်ရမည်။
(ခ) အခြေခံပညာအထက်တန်း (သို့မဟုတ်) တက္ကသိုလ်ဝင်စာမေးပွဲတွင်
သိပ္ပံ၊ ဇီဝဗေဒဘာသာတွဲဖြင့် အောင်မြင်သူဖြစ်ရမည်။ (လျှောက်ထား ခွင့်ရှိသူများအား စုစုပေါင်းရမှတ် အများအနည်းအလိုက်တန်းစီ ဇယားဖြင့် ရွေးချယ်ပါမည်။)
(ဂ) လျှောက်လွှာပိတ်သည့် ၇-၄-၂၀၂၃ရက်တွင် အသက်(၁၈)နှစ်ပြည့်ပြီး (၂၅)နှစ်အောက် ဖြစ်ရမည်။
(ဃ) ပြစ်မှုကင်းရှင်းသူဖြစ်ရမည်။
(င) သတ်မှတ်သင်တန်းချိန်ပြည့်မီရန်နှင့်သင်တန်းပြီးဆုံးအောင်တက်ရောက်နိုင်သူဖြစ်ရမည်။
(စ) ကျန်းမာရေးကောင်းမွန်ပြီး၊ မျက်စိနှင့် ကိုယ်ရောစိတ်ပါကျန်းမာသူ ဖြစ်ရမည်။
(ဆ) သင်တန်းဝင်ခွင့်ရပါက သက်ဆိုင်ရာ သင်တန်းဖွင့်လှစ်သည့်ဆေးရုံမှ မျက်စိနှင့် စိတ်ပိုင်းဆိုင်ရာ ကျန်းမာသူဖြစ်ကြောင်း ထောက်ခံချက် ရမှသာ သင်တန်းတက်ရောက်ခွင့်ရမည်ဖြစ်ပါသည်။
(ဇ) လျှောက်ထားသူသည် နိုင်ငံ့ဝန်ထမ်းဖြစ်ပါက လျှောက်လွှာ ပိတ်ရက်တွင် အသက် (၃၀)နှစ်ထက် မကျော်လွန်သူဖြစ်ရမည်။သက်ဆိုင်ရာဌာန/ဝန်ထမ်း အဖွဲ့အစည်း အကြီးအမှူးထံမှတစ်ဆင့် လျှောက်ထားရမည်ဖြစ်သည်။ (ကြိုတင်မိတ္တူပေးပို့၍ လျှောက်ထား နိုင်ပါသည်) (ရွေးချယ်ခံရပါက မူလရာထူးမှ နုတ်ထွက်နိုင်သူ ဖြစ်ရမည်။ ပင်စင်အလို့ငှဿာ လုပ်သက်ဆက်စပ်ခွင့်ရှိမည်)
(ဈ) အစိုးရဌာနတစ်ခုခု၏ ဝန်ထမ်းအဖြစ်မှ ထုတ်ပစ် (Dismiss) ခြင်း၊ ရာထူးမှထုတ်ပယ် (Removal ခြင်း၊ ရာထူးခန့်ထားခြင်းမှ အမိန့်စာ ပယ်ဖျက်ခြင်းခံရသူများ လျှောက်ထားခွင့်မရှိပါ။
(ည) ဆေးဘက်ကျွမ်းကျင်-၄ (ဓာတ်ခွဲ) (လစာနှုန်း၊ ၁၈၀ဝဝဝိ-၂ဝဝဝိ- ၁၉၀၀၀၀ိ) နေရာများကို နိုင်ငံတော်ဝန်ထမ်းအဖြစ် ခန့်အပ်ခံရပါက မည်သည့် ဒေသတွင်မဆို အနည်းဆုံး (၃)နှစ် မပျက်မကွက် (မပျက်မကွက်) တာဝန်ထမ်းဆောင်နိုင်သူ ဖြစ်ရမည်ဖြစ်ပြီး၊ အနည်းဆုံး (၃)နှစ်တာဝန်ထမ်းဆောင်ပြီးမှသာဆေးဘက်ကျွမ်းကျင်-၄(ဓာတ်ခွဲ) သင်တန်းဆင်းအောင်လက်မှတ်ကို ပေးအပ် မည်ဖြစ်ပါသည်။ (၃)နှစ်မပြည့်မီ ဝန်ထမ်းအဖြစ်မှ နုတ်ထွက်ပါက လျော်ကြေးငွေ ၅၀၀၀ဝိ/-ကျပ်ပေးသွင်းရမည်ဖြစ်ပြီးဆေးဘက်ကျွမ်းကျင်-၄(ဓာတ်ခွဲ)သင်တန်းဆင်းအောင်လက်မှတ်ကို ပေးအပ် မည်မဟုတ်ပါ။
သင်တန်းတက်ခွင့်ရရှိပါက တက္ကသိုလ်/ကောလိပ်/အဝေးသင် တတ်နေသူဖြစ်လျှင် သင်တန်းကာလ အတွင်း ပညာသင်ရပ်နားခွင့်ပြုကြောင်း သက်ဆိုင်ရာ ကျောင်းအုပ်/အကြီးအကဲ၏ ထောက်ခံစာမူရင်း ကိုတက်ခွင့်ရမည့် သင်တန်းတည်ရှိရာ နေပြည်တော်/တိုင်းဒေသကြီး/ပြည်နယ်ဆေးရုံကြီးသို့ ပေးအပ်နိုင်ရမည်။ (သင်တန်းတက်ရောက်စဥ်ကာလအတွင်းမည်သည့်လက်မှတ်ရသင်တန်းမဆို လုံးဝတက်ခွင့် မပြုပါ)
သင်တန်းတက်ရောက်ခွင့်ရရှိပါက အမည်စာရင်းနှင့် သင်တန်းနေရာထုတ်ပြန်သတ်မှတ် ကြေညာခြင်းကို၂၀၂၃ ဇွန်လ ၃၀ရက်နေ့၌ အောက်ပါဌာနများတွင်ကြော်ငြာထားမည်ဟု သိရှိရသည်_
အမျိုးသားကျန်းမာရေးဓာတ်ခွဲမှုဆိုင်ရာဌာနခွဲ၊ ကုသရေးဦးစီးဌာန၊ရန်ကုန်မြို့။
နေပြည်တော်ကုသရေးဦးစီးဌာန၊နေပြည်တော်ပြည်ထောင်စုနယ်မြေ။
သက်ဆိုင်ရာ တိုင်းဒေသကြီး/ပြည်နယ်ကုသရေးဦးစီးဌာနများ။
တက်ရောက်ခွင့်ရသည့် သက်ဆိုင်ရာ သင်တန်းများတည်ရှိရာ၊ နေပြည်တော် ပြည်ထောင်စုနယ်မြေ၊ တိုင်းဒေသကြီး/ပြည်နယ် ဆေးရုံကြီးများ။ (မှတ်ချက်။ သင်တန်းစတင်ဖွင့်လှစ်ပြီး (၂)ပတ် ထက်နောက်ကျပါက သထတန်းတက်ရောက်ခွင့်ပြုမည်မဟုတ်ပါ။)
သင်တန်းတက်ရောက်ခွင့်အမည်စာရင်းကို သီးခြားခေါ်စာပေးပို့ မည်မဟုတ်ပါ။ သက်ဆိုင်ရာ နေပြည်တော်ပြည်ထောင်စုနယ်မြေ၊ တိုင်းဒေသကြီး/ပြည်နယ် ကုရေးဦးစီးဌာနများတွင် ကြော်ငြာ ထားမည်ဖြစ်ပါသည်။
သင်တန်းစရိတ်နှင့် နေထိုင်စားသောက်ရေးကို သင်တန်းသားများ ကိုယ်တိုင် စီစဉ်ကျခံရမည်။
အသေးစိတ်အချက်အလက်များကို စုံစမ်းသိရှိလိုပါက အောက်ဖော်ပြပါဌာနများတွင် ရုံးချိန်အတွင်း ဆက်သွယ်စုံစမ်းမေးမြန်းနိုင်ကြောင်း သိရှိရသည်_
(၁) အမျိုးသားကျန်းမာရေးဓာတ်ခွဲမှုဆိုင်ရာဌာနခွဲ၊ ကုသရေးဦးစီးဌာန။
(ဖုန်း-၀၁-၃၇၁၉၅၇)
(၂) နေပြည်တော်ကုသရေးဦးစီးဌာန၊ နေပြည်တော်ပြည်ထောင်စု နယ်မြေ။
(၃) သက်ဆိုင်ရာ တိုင်းဒေသကြီး/ ပြည်နယ်ကုသရေးဦးစီးဌာနများ။
Source From :
