မြန်မာသံအမတ်ကြီးမှ ဂျပန်နိုင်ငံရောက် မြန်မာကျောင်းသား/သူများအား အထောက်အကူပြုလှူဒါန်းငွေများ ပေးအပ်

မြန်မာသံအမတ်ကြီး ဦးမြင့်သူသည် Myanmar Youth and Student Association (MYSA) မှ President ဒေါ်မေယမုံခိုင်နှင့် အမှုဆောင်ကော်မတီဝင်များ၊ မြန်မာကျောင်းသား/ ကျောင်းသူများအား (၂၀-၉-၂၀၂၀) ရက် နံနက်ပိုင်း၌ မြန်မာသံရုံးတွင် တွေ့ဆုံခဲ့ပါသည်။

ထိုသို့ တွေ့ဆုံရာတွင် မြန်မာသံအမတ်ကြီးမှ ဂျပန်နိုင်ငံသို့ ရောက်ရှိ ပညာသင်ကြား နေကြသည့် မြန်မာကျောင်းသား/ကျောင်းသူများအနက် COVID-19 ကြောင့် ပညာသင်ကြားရေး နှင့် နေထိုင်ရေးတို့တွင် အခက်အခဲများနှင့် ရင်ဆိုင်ကြုံတွေ့ နေရသည့် ကျောင်းသား/ကျောင်းသူ (၅၀)ဦးကို ဂျပန်နိုင်ငံ၊ AEON 1% Club Foundation မှ လှူဒါန်းသည့် ပညာသင်ကြားမှု အထောက်အကူပြု လှူဒါန်းငွေများကို ဖောင်ဒေးရှင်း ကိုယ်စားပေးအပ်ခဲ့ပါသည်။ထို့အပြင်၊ မြန်မာသံရုံးမှ တက်ရောက်လာသည့် ကျောင်းသား/ကျောင်းသူများအား Masks များ ပေးအပ်ခဲ့ပါသည်။

AEON 1% Club Foundation သည် ၂၀၀၆ ခုနှစ်မှစတင်၍၊ မြန်မာနိုင်ငံမှ အခြေခံပညာ အထက်တန်းနှင့် တက္ကသိုလ်ကျောင်းသား/ ကျောင်းသူများအား ပညာသင်ဆု ပေးအပ်ခဲ့ ပါသည်။ ၂၀၁၄ ခုနှစ်မှ စတင်၍ ရန်ကုန်မြို့၊ စီးပွားရေးတက္ကသိုလ်နှင့် ရန်ကုန်နိုင်ငံခြား ဘာသာသင် တက္ကသိုလ်တို့သို့လည်း ပညာသင်ဆုများ ပေးအပ်ခဲ့ပါသည်။ ထို့အပြင်၊ Teenage Ambassadors အစီအစဉ်ဖြင့် မြန်မာနိုင်ငံမှ အထက်တန်းအဆင့် ကျောင်းသား/ ကျောင်းသူများ ကို ဂျပန်နိုင်ငံသို့ ဖိတ်ခေါ်ပြီး၊ အာရှ-ပစိဖိတ် (၁၇) နိုင်ငံမှ ကျောင်းသား/ ကျောင်းသူများ နှင့် တွေ့ဆုံပွဲများ ကျင်းပပေးလျက်ရှိပါသည်။

AEON 1% Club Foundation သည် မြန်မာနိုင်ငံတွင် စာသင် ကျောင်းများ ဆောက်လုပ် လှူဒါန်းခြင်း၊ ကုလသမဂ္ဂ UNICEF အဖွဲ့နှင့် ပူးပေါင်း၍ ၂၀၁၀ ပြည့်နှစ်မှစတင်ပြီး၊ ကျေးရွာ များတွင် သောက်သုံးရေ သန့်ရရှိရေးစီမံကိန်း၊ သစ်ပင်စိုက်ပျိုးရေးစီမံကိန်းများတွင်လည်း တက်ကြွစွာ ပါဝင်ဆောင်ရွက်လျက်ရှိသည့် အဖွဲ့အစည်းဖြစ်ကြောင်း သိရှိရပါသည်။

Ministry of Foreign Affairs Myanmar