Sales Hotline : 09448001653       Download App



အဝေးသင်တက္ကသိုလ်များတွင် အနီးကပ်နှစ်ကြိမ်တက်ရမည့် အစီအစဉ် မလုပ်တော့ရန် ဆုံးဖြတ်

အဝေးသင်တက္ကသိုလ်များတွင် အနီးကပ်နှစ်ကြိမ်တက်ရမည့် အစီအစဉ် မလုပ်တော့ရန် ဆုံးဖြတ်

အဝေးသင်တက္ကသိုလ် ၀ိဇ္ဇာအထူးပြုဘာသာရပ်များ အနီးကပ်သင်တန်းနှစ်ကြိမ်တက်ရမည့်အစီအစဉ်ကို ကန့်ကွက်မှုများ ရှိသဖြင့် မလုပ်တော့ရန်ဆုံးဖြတ် လိုက်သည်ဟု အဆင့်မြင့်ပညာ ဦးစီးဌာန ညွှန်ကြားရေး မှူးချုပ် ဒေါက်တာသိန်းဝင်းက ပြော ကြားသည်။

အဝေးသင်ဝိဇ္ဇာအထူးပြုများသည် နှစ်စဉ် အနီးကပ်သင်တန်းကို တစ်နှစ်လျှင် တစ်ကြိမ် ၁၀ ရက် တစ်ဆက်တည်းတက်ရသည်။

သို့သော် ယခုနှစ်ကစတင်ကာ အဝေးသင်တက္ကသိုလ်များတွင် Orientation (ဘာသာရပ် မိတ်ဆက်ခြင်း) အစီအစဉ်ပြုလုပ်ရန် ၀ိဇ္ဇာဘာသာရပ် အထူးပြုများသည် မေလတွင် အနီးကပ်ငါးရက်၊ နိုဝင်ဘာ တွင် ငါးရက်ခွဲတက်ရမည်ဖြစ်ပြီး တက်ရောက်မှုကို စာမေးပွဲအမှတ်ပေးစည်းမျဉ်း၌ ထည့်သွင်းစဉ်းစားရမည်ဟု အဆင့်မြင့်ပညာဦးစီးဌာနက တက္ကသိုလ်များသို့ ဒီဇင်ဘာနောက်ဆုံး ပတ်တွင် ညွှန်ကြားခဲ့သည်။

သို့သော် ကန့်ကွက်မှုများရှိ ၍ အနီးကပ်နှစ်ကြိမ်တက်ရမည့် အစီအစဉ်မလုပ်တော့ရန် ပညာရေးဝန်ကြီးဌာနက ဆုံးဖြတ်ခြင်း ဖြစ်ကြောင်း ဒေါက်တာသိန်းဝင်းကဆိုသည်။

‘‘ဒီလမ်းစဉ်နဲ့ သွားဖို့ ပါချုပ် တွေကို ပထမချပြတယ်။ အဓိကက ကျွန်တော်တို့ Quality ဖြစ် အောင်လုပ်ဖို့လိုတာ။ ဒါပေမဲ့ အ လုပ်ခွင်မှာ အဆင်မပြေဘူးဆိုတဲ့ Issue တွေတက်လာတာမို့ အရင် လမ်းစဉ် အတိုင်းပဲသွားဖို့ ကျွန်တော်တို့ အကြမ်းဖျင်းဆုံးဖြတ် ထားတယ်။ လမ်းစဉ်မပြောင်းတာ မို့ အရင်အတိုင်းပဲ’’ ဟု ၎င်းက ပြောသည်။

အဝေးသင်ကျောင်းသားများတွင် နိုင်ငံ့ဝန်ထမ်းများ၊ စက်ရုံ၊ အလုပ်ရုံ၊ ကုမ္ပဏီဝန်ထမ်းများ၊ နိုင်ငံတကာရောက်ရွှေ့ပြောင်း လုပ်သားများစွာ ပါဝင်နေခြင်းကြောင့် အနီးကပ်နှစ်ကြိမ်ခွဲတက်ရပါက အလုပ် အကိုင်ခွင့်ရက် ပြဿနာနှင့် လူမှုဘ၀များစွာ ထိခိုက်လာနိုင်သည်ဟု အဝေးသင် ကျောင်းသားအဖွဲ့အစည်းများက ကြေညာချက်ထုတ်ပြန်ကန့်ကွက်ခဲ့သည်။

အစီအစဉ်ကို ပြန်လည်ပြင် ဆင်ပေးရန် နိုင်ငံအနှံ့ရှိ အဝေးသင် ကျောင်းသား၊ ကျောင်းသူ ၁၀၀ ခန့်လက်မှတ်ထိုးကာ နိုင်ငံတော်၏ အတိုင်ပင်ခံပုဂ္ဂိုလ်ထံ ဇန် န၀ါရီ ၂၂ ရက်တွင် စာပို့တောင်း ဆိုခဲ့ သည့် အပြင် ‘ကျောင်းသားထုဆန္ဒမပါသော အဝေးသင်စနစ်သစ် အလိုမရှိ’ စာသားပါဖဲကြိုးနီ ပုံကို အဝေးသင်တက္ကသိုလ် ကျောင်းသားအချို့က လူမှုကွန် ရက်တွင်တင်ကာ ကန့်ကွက်ခဲ့သည်။

အဝေးသင်အနီးကပ်သင်တန်းနှစ်ကြိမ်တက်ရမည့် အစီအစဉ်ကို သင်ကြားမှုပိုင်းတွင် ပိုမို ထိရောက်မှုရှိစေရန် ရည်ရွယ်စီ စဉ်သော်လည်း ကန့်ကွက်မှုများရှိသဖြင့် ပြန်လည်သုံးသပ်မည်ဟု ပညာရေး ၀န်ကြီးဌာနဒုတိယ၀န်ကြီး ဦးဝင်းမော်ထွန်းက ဇန်န၀ါရီ ၂၂ ရက် နေပြည်တော်လွှတ်တော် အစည်းအဝေးအပြီး၌ မီဒီယာများ၏ မေးမြန်းမှုကို ဖြေကြားခဲ့ သည်။

source: 7day

News Read 5292 times